Estudean si un onso abistau en o Roncal ye 'Camille' u bel exemplar d´o Pireneu uescano

Un guarda forestal se topó con l´animal en o monezipio nabarro de Garde y agora analizan os restos de pelo y fezes ta identificar-lo mediante l´ADN.

O Gubierno de Nabarra ha obteniu material gráfico y téunico sobre a presenzia d´un onso en a bal nabarra de Roncal por primer begada en diez años, dimpués de que una colla de guardas beyese, a nomas de güeito metros de distanzia, un exemplar en a zona de Garde.

Manimenos, estarán os estudios d´ADN os que determinarán si se trata de Camille, d´o que no se teneban notizias direutas encara que s´eba deteutau una dezena larga d´enrestidas a ganau, u si puede estar un exemplar prozedén d´os que se introduzion en Uesca (os clamaus Aspe y Nere son os más probables), encara que por l´inte lo han baltizau como Ponciano.

O primer abistamiento estió a zaguer semana cuan un guarda forestal trobó en un pinar de Garde o puesto an podría dormir l´onso con restos de pelo y fezes. A l´atro´l diya i regresó acompañau de guardas d´o Servicio de Meyo Ambien, qui confirmoron a presenzia d´un onso pardo en o lugar. Pero cuan i reculliban muestras ta reyalizar as pruebas d´ADN, a 15 metros les aparixió un onso que, con paso lento y despreocupau, s´amanó enta ellos.
Se da la zircunstancia de que mientres iste onso se muebe por o término de Garde, en os paraches de Larra y Ukerdi s´han trobau atros rastros que no han puesto estar identificaus, y que apuntan a la posibilidat d´un segundo exemplar.

ONSO SÍ, ONSO NO

O programa de raso en aragones de Radio Topo, Fendo Orella, que s´emite os biernes de 19 a 20 oras, torna con o debate inrematable: os onsos en o Pirineu, baxo lo titol onso si, onso no, a sezion d´animals d´Aragón de dito programa, que se fa en a sezion d´ecoloxía d´o mesmo, quiere prebar d´analizar as posibilidaz d´os onsos en un frachil ecosistema como ye a cordillera pirinenca.
Si querez dar a buestra opinion podez fer-lo nimbiando un e-mail a fendo.orella@gmail.com, u a trabies d´o suyo blog http://www.fendoorella.wordpress.com/.

A bier si muita chen nimbia a suya opinion y pueden fer un programa intresan sobre un problema que ye fendo tremolar a tot l´ecosistema pirinenco.

En a foto, Palouma, a primera onsa que o gobierno franzes trayó d´Eslobenia ta repoblar de plantigrados os Pirineus y que trobon muerta o 22 d´agosto d´o 2006.

A notizia la podez trobar en: http://fendoorella.wordpress.com/2008/03/09/onso-si-onso-no-o-debate-que-nunca-no-remata-agora-tamien-en-fendo-orella/

O numero de fembras d´onso pardo s´ha duplicau en a cordillera cantábrica en una década

O número de fembras d´onso pardo s´ha duplicau en os zaguers diez años en toda la Cordillera Cantábrica, encara que en mayor mida en a zona ozidental que en a oriental. En o caso d´ista zaguer, que abraca Cantabria y Palencia, en os dos zaguers años s´han trobau tres onsas esferens con oseznos, lo que implica que s´ha consolidau la reproduzión, segúntes o presiden d´a Fundación Oso Pardo, Guillermo Palomero.

Asínas, en 2006 se detectoron dos onsas con dos críetas en os mons de Vega de Liébana, Pesaguero y Chirmandat de Campoo de Suso, y en 2007 una onsa con o suyo osezno en os mons de Pesaguero y Polaciones. En l´autualidat, ista poblazión oriental cuenta con un zenso aproximau de 30 onsos.

Por a suya parti, a población ozidental, que se troba entre l´oziden d´Asturias y en l´Alto Sil leonés, acaza alto u baxo 100 exemplars y se mantiene una tendenzia crecien en os zaguers años.

Antimás, en o bienio 2006-2007 s´han trobau 440 indicios "inequívocos" de presencia de onsos en Cantabria, zifra que triplica la obtenida a l´escomenzipied´a decada, con 132 en o 2000-2001.

Istos datos meten de manifiesto, segúntes o presiden d´a Fundazión Onso Pardo, que s´ha aturau o prozeso de regresión en toda la cordillera y cada begada ye más frecuen a presenzia d´iste animal en a zona oriental, an se troba más menazau.

Ista buena ebolución ye debida, seguntes dizio, a l´amilloramiento d´o suyo afincamiento y l´apoyo sozial enta os onsos, que son "mui bien toleraus" por os bezins d´as redoladas por as que transitan.

Aparix una ballena en enantau estau de descomposizión en Platja d'Aro (Cherona)

A brigada d´o conzello de Platja d'Aro ha trobau güé una ballena en enantau estau de descomposizión frente a la costa d´a Cala de Belladona, han informau fuens monezipals.
Achens d´a Polizia Local y d´o Seprona d´a Guardia Zebil s´han desplazau güe de maitins dica o puesto ta prebar de remolcar dica o puerto o cuerpo d´a ballena, que mide entre seis y siete metros de largo y se troba en enantau estau de descomposizion, por o que podría fer bels diyas u semanas de l´inte d´a suya muerte.
O consistorio de Platja d´Aro s´ha meso en contauto con o Zentro de Recuperazión d´Animals Marinos de Cataluña (CRAM) ta que os albeitars prenan una muestra d´os restos d´o zetazeo ta fer-le una necropsia que pueda determinar o suyo lugar d´orichen y a causa d´a muerte.

No ye l´unico caso d´ista mena iste mes, o diya 6 un atro zetazeo morió en as costas de Marbella tras colisionar con unas rocas. Os albeitars, aduyaus por bels boluntarios y por un remolcador que prebaba d´ebitar a muerte por asfixia d´o zetazeo, d´a espezie balaenoptera physalus (rorcual común), no podion fer cosa por a suya bida.

A foto ye d´a ballena que morió en a costa andaluza, cuan bels boluntarios prebaban de salbar-la.

Chile adoptará lais ta protexer a las ballenas de traza indefinida

O Gubierno de Chile anunzió lo chuebes que adoptará una lai de "protezión indefinida" d´as ballenas y o suyo entorno en as auguas chilenas, seguntes informó a ministra de Meyo Ambien d´ixe pais, Ana Lya Uriarte.
"Imos a dictar una lai que enante en a protezión indefinida d´os zetázeos en Chile", dizio tras reunir-se con Gustavo Vergara, boluntario chileno que remanió tres meses a bordo d´un barco de Greenpeace encorrindo a la flota ballenera xaponesa desplegada en auguas d´a Antártida.
"Él representa o clamor que tot lo mundo ye fendo ta ebitar a captura d´istos zetázeos por parti de Xapón", aseguró Uriarte.
Adibió que o Gubierno ye "treballando en esferens alternatibas que amparen encara más ista prohibición legal de captura de zetázeos de traza de buscar atras formulas de protezión, no sólo que d´as ballenas, sino tamién d´os puestos an ellas se troban; an acubillan y an minchan".
Antimas, a ministra esplanicó que a norma chilena bichen de protezión a las ballenas nomas se extiende que dica l´año 2025.
Chile acullira en chunio d´iste año a sisantena trobada d´a Comisión Ballenera Internazional (CBI).

A rana pirinenca

Nombre en latin: Rana pyrenaica

Nombre en castellán: Rana pirenaica

Nombre en aragonés: Rana (granota, rama, grina) pirinenca

Una mica d´istoria: estió en 1990 cuan Jordi Serra, dotor en bioloxia d´o Instituto Pirinenco d´Ecoloxia, pertenezien a o CSIC, descubrió iste anuro, que estió descrito tres años mas tardi

Carauteristicas: Ye a rana parda mas chicota, y ye endemica d´un seutor chicot d´os Pireneus (dende o Roncal dica Ordesa), an ocupa galoxas entre 1100 y 1700 m. Cal dizir que a rana bermella tamien se troba en altarias similars u encara mas alteras.

L´aspeuto grazil, o timpano chicot y as narinas deseparadas, mas que a distanzia entre os güellos, son rasgos clau d´identificazion.

Grandaria: dica 5 zm.

Crias: dica 150 güegos baxo peñas, a puesta ye a finals de febrero.

Estatus: Bulnerable, localmen comun.

Espezies parellanas: rana bermella, rana axil.

Curiosidaz: gosa bibir en galoxas pedregosas de montaña, d´auguas limpias y bien oxichenadas. De traza ocasional se´n han trobau de ranas pirenaicas en balsetas con una renobazion d´augua constante.

A cheneta u tremostela

Nombre en latin: genetta genetta

Nombre en castellan: gineta, jineta

Nombre en aragonés: cheneta, tremostela

Una mica d´istoria: Iste peculiar y cuasi desconoxiu animal, se troba disperso por toda la cheografia aragonesa. I plegó con os arabes, que lo gosaban emplegar como mascota, istos eslampón d´as casas d´os suyos dueños y escomenzipión a criar en libertar, y asinas... dica güé!

Carauteristicas: o rasgo mas estintibo d´iste carniboro mediano, felino, y de garras prou curtas, ye a suya coda, mui larga y con aniellos blangos y negros. A suya parti superior son escoloridas (de color arena) y moteadas de negro. As suyas orellas son grans. Pencha con muita axilidat y gosa fer as suyas autibidaz de nueis. De diyas, escansa en zarzals y foraus d´abres, y ta criar emplega foraus rocosos u d´abres.

• Grandaria: cuerpo 40-60 zm; coda 40-50 zm.


• Crias: 1-2 cachurriadas de 2-4.


• Dieta: roedors, coniellos, abes, reptils, anfibios, insectos y frutos.


• Espezies similars: gato montesino.


• Mazelos de 3 zm de largo


• Fezes de 2.5 zm de largo

Curiosidaz: le cuaca mas que mas o mon baxo con roquedos y os terrenos arbolaus ubiertos, acampos semidixadas; tamien ocupa as oriellas d´os rios y as galoxas.