Os zientificos troban o paso de cuatro exemplars entre ras dos collas de ro norte, isolatos dende fa 50 años As dos poblazions d´onso pardo cantabrico que bi remanen son más amán entre sí de ro que se pensaba. Os zaguers dos años, os xenetistas de ro departamén de Biolochía Funzional de ra Unibersidat d´Obiedo han descubierto que, a ro menos cuatro exemplars s´iban mobito entre una y atra poblazión, seguntes fuens amáns a ra imbestigazión. Dimpués d´analizar fezes y pelos trobatos por o campo, o ADN ha rebelato que 3 masclos han pasato de ra poblazión oczidental (a más poblada, 75-100 exemplars) a ra oriental (25-30 animals) y uno fazio ro camín contrario.
En 2006, os zientificos dectectón por primera bez un “brinco” entre ras dos poblazions. A l´onso ro baltizón como
L´Emigrán, porque pensón que yera un feto isolato. As barreras entre ras dos collas (más que más l´autopista AP-66, que parte ra cordillera, y en a que ro zaguer 28 d´octubre morió atropellada por un cambión una cría d´onso) parixeban masiato grans ta istar ebitadas. Entre ra poblazion asturiana y ra de Palenzia, b´ha un corredor de bels 50 kilometros salpicato d´infraestructuras.
D´atra man, un informe zientifico nimbiato en abiento a ro Prenzipau d´Asturias y a ra
Junta de Castilla y León rebela que ros mobimiens son más frecuens de ro que no creyeban. O informe, mostra que bels exemplars han trobato un camin, pese a ras muitas barreras que deseparan os dos puestos. O
Ministerio de Medio Ambiente y ra
Fundazión Oso Pardo treballan en a recuperazion de ro corredor, considerato esenzial pa ebitar o isolamiento xenetico de ras poblazions, pa ro cual, imbertirán 1,5 millons d´euros. Os estudeos apuntan que ras dos collas, leban 10 chenerazions (u siga entre 50 y 75 años) separatos.
Os zentificos consideran que ro cruze entre ras dos poblazions ye alazetal pa ebitar a perdita de dibersidat chenetica. Por o inte, no ne b´ha de pruebas de que s´aigan cruzato ambas poblazions, pero ya no ye descartable. A poblazion d´onso cantabrico empezipio a crexer en os años nobanta. En os zaguers 10 años, o numero d´onsas con crietas zensadas s´ha duplicato.
En a Cordillera cantabrica ye asabelo complicato conoxer os mobimientos d´os onsos, ya q ye una de ras unicas poblazions sin exemplars marcatos ta seguir-los por satelite. Fa una decada os zentificos metion un marcador a un onso, con o que seguiban a toda ra suya familia. L´onso morió azidentalmén, pero bi abio tal rebolizio que no se tornó a capturar atro exemplar ta implantar-le un chip.
L´onso cantabrico ye l´unico autoctono biable d´a Peninsula Iberica; pues en os Pireneus, solo quedan que dos masclos autoctonos dende que ro 1 de nobiembre de 2004 un cazataire franzés abatió a Canelle, a resta d´exemplars introduzitos en dita cordillera son eslobenos.
