sábado, 29 de diciembre de 2007

Culibilla


Loiras y Sarrios ye un blog que escomenzipia güe. O mio ochetibo ye charrar, mas que mas, d´animals y de biolochía en cheneral, pero tamien me cuacarba charrar d´atras cosetas que considere intresans.


O nombre d´o blog, bueno, ha estato discutito, pero a la fin ha ganato iste. L´atro candidato yera Culibilla, que yera o nombre d´una diosa pirinenca, filla de Arafita y Anayet, os dioses mas pobres d´os Pirineos. Culibilla yera una diosa muito polida, que sentiba muito afeuto por as formigas blangas que bibiban en a ladera d´o mon, y estió ella, Arafita qui baltizo a ixa ladera an bibiban as formigas como O Formigal. Culibilla teneba muitos pretendiens, pero a toz ros rechazaba. Un diya o dios Balaitús, o dios mas fuerte y temito, ixe que feba plorar pedregadas a o zielo, o mesmo que aluziaba ras zentellas en as tronadas, s´enamoró d´ista, y Culibilla, ro rechazó, encara que sabeba d´a suya fortaleza no l´amedrantó. Balaitús s´encarraño muitismo en saber qu´ista no quereba acomodar-se con él, asinas que se proposó raptar-la. En tres zancadas se presento frente a Culibilla, y mientras a resta de montañas se miraban a ra pobre diosa sin saber que fer, creyendo toz que iba a pasar o pior, y en ixe inte, en ixe inte en o que a resta de mons creyeban que o mundo s´aturaba, que a polideza remataba, Culibilla chilo:"A yo as formigas" y as formigas blangas bi fuon, y cubrion entera a Culibilla. Allora, Balaitús s´amedrantó y marchó ascape. Estió antonzes cuan Culibilla se fazio una brecha en o corazón ta que i dentrasen as formigas. Ixa brecha ye güe o forato d´a Foratata, y Culibilla ye ixa peña que bichila ra bal de tena, y que da encara más polideza a dita bal: a peña Foratata. Por ixo, ya no bi ha formigas blangas en o Formigal, sino apartamentos y apartamentos y pistas d´esqui, que, sin garra duda, ha construyito ro dios Balaitús, que encara no ha xublidato a ra polidisma Culibilla.


Con ista falordia, tos dixo, dica atro diya, con istorietas mas acordes con o nombre definitibo


que pasez buena tardi de sabado!

2 comentarios:

Choben dijo...

Balaitús se carrañó y a la fin mercó buena cosa d'as aczions d'aramón, te s'ha xublidau.

Por zierto, iste maitín m'he trobau con Chulia Barrau que yera demandando por o suyo regalo... busatros sabrez ;-)

En fin, a blogosfera en aragonés creixe a monico, agora a dar continuidat! Noragüena por prezipiar con o blog, maitín mesmo lo fico en o mío (agora no porque luego me'n iré). Asperamos as tuyas notizias!

A pasar un buen nadal y que l'añada benién siga buena!

charrabís dijo...

Enorabuena, Culibilla, por prenzipiar con un blog en aragonés.

Me pareixe chenial o tema, seguro que luego veremos buenas notizias d'animals y d'ecolochía -y nina, con iste comenzar ye muit probable que os dioses pirenencos te darán a suya bendizión! qué suerte!-.
Esperando nos tiens nuebas notizias.

Buen Nadal y cabo d'año!